ພຣະເຈົ້າໄດ້ອວຍພອນນາງຊາຣາໃຫ້ມີລູກຕາມທີ່ພຣະອົງໄດ້ສັນຍາໄວ້ກັບອັບຣາຮາມ. ນາງຊາຣາໄດ້ຕັ້ງທ້ອງ ແລະ ເກີດລູກຊາຍຄົນໜຶ່ງ. ອັບຣາຮາມໄດ້ໃສ່ຊື່ໃຫ້ລູກຊາຍວ່າ “ອີຊາກ.” ການເກີດຂອງອີຊາກໄດ້ເຮັດໃຫ້ອັບຣາຮາມ ແລະ ຊາຣາມີຄວາມຊົມຊື່ນຍິນດີຈາກການທີ່ໄດ້ລໍຄອຍມາເປັນເວລາດົນນານຕະຫຼອດຊີວິດ. ອັບຣາຮາມກໍໄດ້ຈັດງານສະຫຼອງຢ່າງຍິ່ງໃຫຍ່ໃຫ້ແກ່ການເກີດລູກຊາຍຂອງເພິ່ນ.
ແຕ່ສຳລັບນາງຮາກາແລ້ວ ການເກີດຂອງອີຊາກນີ້ໄດ້ຢຸດສິ່ງທີ່ນາງໄດ້ໄຝ່ຝັນໄວ້ມາຕະຫຼອດ. ສ່ວນອິດສະມາເອນລູກຊາຍຂອງນາງຮາກາເບິ່ງຄືວ່າຈະເປັນຜູ້ສືບທອດມໍລະດົກຂອງອັບຣາຮາມ ແຕ່ຕອນນີ້ ລາວບໍ່ໄດ້ຮັບຄວາມສຳຄັນຄືດັ່ງແຕ່ກ່ອນ. ຍ້ອນຄວາມຜິດຫວັງ ທັງສອງແມ່ລູກຈຶ່ງພາກັນກຽດຊັງອີຊາກລູກຊາຍຂອງນາງຊາຣາ ແລະ ເມື່ອເຫັນທຸກຄົນຊົນຊື່ນຍິນດີກັບການເກີດຂອງອີກຊາກ ກໍຍິ່ງເຮັດໃຫ້ສອງແມ່ລູກຄູ່ນີ້ເກີດຄວາມອິດສາຫຼາຍຂຶ້ນ.
ອິດສະມາເອນເຍາະເຍີ້ຍອີຊາກຢູ່ເລື້ອຍໆ ເມື່ອນາງຊາຣາເຫັນວ່າ ການປະພືດຂອງອິດສະມາເອນທີ່ມີຕໍ່ອີຊາກນັ້ນເຮັດໃຫ້ເກີດຄວາມບໍ່ສະຫງົບຢູ່ໃນເຮືອນ. ສະນັ້ນ ນາງຊາຣາຈຶ່ງຂໍຮ້ອງອັບຣາຮາມໃຫ້ຂັບໄລ່ນາງຮາກາ ແລະ ອິດສະມາເອນອອກໄປຈາກເຮືອນ ແຕ່ອັບຣາຮາມກໍຮັກນາງຮາກາ ແລະ ອິດສະມາເອນເຊັ່ນກັນ ເພິ່ນຈຶ່ງທຸກໃຈຫຼາຍ ແລະ ບໍ່ຮູ້ວ່າ ຈະເຮັດແນວໃດ. ໃນຂະນະທີ່ຈິດໃຈວຸ່ນວາຍຢູ່ນັ້ນ ອັບຣາຮາມກໍໄດ້ອະທິຖານຫາພຣະເຈົ້າເພື່ອຈະໄດ້ຮູ້ວ່າ ເພິ່ນຄວນເຮັດແນວໃດດີ. ແລ້ວພຣະເຈົ້າກໍໄດ້ບອກອັບຣາຮາມໃຫ້ເຮັດຕາມທີ່ນາງຊາຣາຕ້ອງການ. ພຣະເຈົ້າຍັງບອກໃຫ້ອັບຣາຮາມຮູ້ວ່າ ເຖິງແມ່ນວ່າ ອິດສະມາເອນຈະອອກໄປຈາກບ້ານຂອງພໍ່ ແຕ່ພຣະເຈົ້າຈະບໍ່ປະຖິ້ມອິດສະມາເອນ ແລະ ຈະອວຍພອນໃຫ້ລາວກາຍເປັນຊົນຊາດໃຫຍ່. ແລ້ວອັບຣາຮາມກໍໄດ້ປະຕິບັດຕາມຄຳສັ່ງຂອງພຣະເຈົ້າ ເຖິງແມ່ນວ່າ ເພິ່ນຈະມີຄວາມເຈັບປວດໃຈ ແລະ ມີຄວາມທຸກໃຈໃນຂະນະທີ່ສົ່ງນາງຮາກາ ແລະ ອິດສະມາເອນອອກໄປຈາກເຮືອນ.
ການແຕ່ງງານ
ພຣະເຈົ້າມີຈຸດປະສົງໃຫ້ການແຕ່ງງານລະຫວ່າງຜົວ ແລະ ເມຍໃຫ້ໝັ້ນຄົງຖາວອນ. ພວກເຂົາຈະຕ້ອງບໍ່ມີຄວາມສຳພັນກັບຊາຍ ຫຼືຍິງຄົນອື່ນໆ. ຖ້າຜົວ ຫຼືເມຍລະເມີດຄຳໝັ້ນສັນຍາຕໍ່ກັນແລະ ກັນໂດຍແຍກຕົວໄປຫາຄູ່ສົມຣົດຄົນອື່ນ ຄອບຄົວຈະມີຄວາມໂສກເສົ້າ ແລະ ຜົນຂອງການແຍກທາງກັນນັ້ນກໍຄື ຫົວໃຈທີ່ແຕກສະລາຍ, ມີຄວາມອິດສາ ແລະ ມີຄວາມບໍ່ພໍໃຈກັນ. ພຣະເຈົ້າຢາກໃຫ້ຄອບຄົວຂອງພວກເຮົາມີຄວາມສຸກ. ສະນັ້ນ ພຣະອົງຈຶ່ງໄດ້ປະທານພຣະບັນຍັດໃຫ້ພວກເຮົາຄື "ຢ່າຫຼິ້ນຊູ້ສູ່ຜົວເມຍຄົນອື່ນ" (ອົບພະຍົບ 20:14). ຄຳສັ່ງທີ່ພຣະເຈົ້າໄດ້ໃຫ້ອັບຣາຮາມໃນເລື່ອງນີ້ ແມ່ນກ່ຽວກັບຄວາມສັກສິດຂອງຊີວິດການແຕ່ງງານ ເຊິ່ງເປັນບົດຮຽນໃຫ້ແກ່ຄົນທຸກຍຸກທຸກສະໄໝ.
ອ້າງອີງຈາກປຶ້ມ "ພຣະຄຳພີ" ປະຖົມມະການ 21:1-21.
ອ້າງອີງຈາກປຶ້ມ "ບັນພະຊົນກັບຜູ້ເຜີຍພະວະຈະນະ" (ສະບັບພາສາໄທ) {ໜ້າ 145-147} ຂຽນໂດຍ ທ່ານ ນາງ ເອເລັນ ຈີ. ໄວທ.
ຫຼາຍປີຜ່ານໄປ ເມື່ອອີຊາກໃຫຍ່ຂຶ້ນເປັນບ່າວແລ້ວ ພຣະເຈົ້າກໍໄດ້ປາກົດແກ່ອັບຣາຮາມ ແລະ ກ່າວວ່າ: “ອັບຣາຮາມເອີຍ! ຈົ່ງເອົາລູກຊາຍຜູ້ດຽວທີ່ເຈົ້າຮັກຫຼາຍນັ້ນໄປທີ່ພູເຂົາໂມລິຢາ... ໃຫ້ເຈົ້າເຜົາລາວຖວາຍເປັນເຄື່ອງບູຊາໃຫ້ແກ່ເຮົາທີ່ນັ້ນ.”
ພໍອັບຣາຮາມໄດ້ຍິນແນວນັ້ນ ເພິ່ນກໍຮູ້ສຶກເສຍໃຈຫຼາຍ ແລະ ທໍລະມານໃຈທີ່ສຸດທີ່ໄດ້ຮັບຄຳສັ່ງໃຫ້ເອົາລູກຊາຍຂອງເພິ່ນເປັນເຄື່ອງບູຊາເຜົາຖວາຍໃຫ້ພຣະເຈົ້າ. ອັບຣາຮາມຄິດວ່າ ເລື່ອງນີ້ມັນເປັນເລື່ອງທີ່ເປັນໄປບໍ່ໄດ້ເລີຍ.
ອັບຣາຮາມໄດ້ຍ່າງອອກໄປຂ້າງນອກເຕັນ ແລະ ຫຼຽວເບິ່ງທ້ອງຟ້າທີ່ປອດໂປ່ງ ແລະ ມິດງຽບ. ເພິ່ນຄິດເຖິງພຣະສັນຍາທີ່ໄດ້ຮັບຈາກພຣະເຈົ້າຄັ້ງທຳອິດທີ່ບອກວ່າ: “ເຈົ້າຈະມີເຊື່ອສາຍຫຼວງຫຼາຍເໝືອນດັ່ງດວງດາວເຫຼົ່ານີ້...” ແລະ ເພິ່ນຄິດອີກວ່າ: “ຖ້າພຣະສັນຍານີ້ຈະສຳເລັດໂດຍທາງອີຊາກແລ້ວ. ເປັນຫຍັງ ຈຶ່ງຕ້ອງຂ້າອີຊາກ? ເປັນຫຍັງ ພຣະເຈົ້າຈຶ່ງຕ້ອງໃຫ້ເຮົາເຮັດເຊັ່ນນີ້?” ອັບຣາຮາມກົ້ມໜ້າລົງພື້ນດິນ ແລະ ອະທິຖານດ້ວຍຄວາມຈິງຈັງຢ່າງທີ່ບໍ່ເຄີຍອະທິຖານມາກ່ອນ ເພື່ອຂໍໝາຍສຳຄັນຢືນຢັນວ່າ ຄຳສັ່ງໃຫ້ຖວາຍລູກຊາຍຂອງຕົນນັ້ນ ແມ່ນມາຈາກຄຳສັ່ງຂອງພຣະເຈົ້າແທ້ຫຼືບໍ່. ແຕ່ຫຼັງຈາກທີ່ອັບຣາຮາມອະທິຖານແລ້ວ ເພິ່ນກໍບໍ່ໄດ້ຮັບໝາຍສຳຄັນປະການໃດເລີຍ ແຕ່ສຽງຂອງພຣະເຈົ້າທີ່ໄດ້ສັ່ງໃຫ້ເພິ່ນຖວາຍອີຊາກນັ້ນ ກໍຍັງດັງກ້ອງກັງວານຢູ່ໃນຫູຂອງເພິ່ນຕະຫຼອດ.
ຈາກນັ້ນ ອັບຣາຮາມໄດ້ເຂົ້າໄປຍັງຫ້ອງນອນຂອງອີຊາກ ແລະ ເຫັນອີຊາກກຳລັງນອນຫຼັບຢູ່ ຜູ້ເປັນພໍ່ໄດ້ແນມເບິ່ງໃບໜ້າລູກຊາຍຜູ້ດຽວທີ່ເພິ່ນຮັກຫຼາຍ ແລ້ວເພິ່ນກໍປິ່ນໜ້າຍ່າງອອກຈາກຫ້ອງໄປດ້ວຍຄວາມສັ່ນສະທ້ານຢ້ານ ແລະ ເປັນທຸກ. ອັບຣາຮາມໄດ້ໄປຢືນຢູ່ຂ້າງໆເມຍຂອງເພິ່ນທີ່ກຳລັງນອນຫຼັບຢູ່ເຊັ່ນກັນ ເພິ່ນປາຖະໜາຢາກຈະເລົ່າເລື່ອງນີ້ ເຊິ່ງມັນເປັນພາລະໜັກທີ່ຢູ່ໃນໃຈໃຫ້ເມຍຂອງເພິ່ນຟັງ ແຕ່ເພິ່ນກໍຢ້ານວ່າ ເມຍຈະຂັດຂວາງ ເພາະຊີວິດຂອງນາງຊາຣາຜູກພັນກັບລູກຊາຍຫຼາຍ ແລະ ດ້ວຍຄວາມຮັກຂອງຜູ້ເປັນແມ່ກໍຄົງຈະບໍ່ຍອມໃຫ້ມີການຖວາຍລູກເປັນເຄື່ອງບູຊາ. ໃນທີ່ສຸດ ອັບຣາຮາມຈຶ່ງໄດ້ຕັດສິນໃຈວ່າ ຈະເຊື່ອຟັງຄຳສັ່ງຂອງພຣະເຈົ້າຢ່າງຄົບຖ້ວນໂດຍ "ເພິ່ນເຊື່ອວ່າ ພຣະເຈົ້າຊົງສາມາດເຮັດໃຫ້ອີຊາກຟື້ນຄືນມາຈາກຄວາມຕາຍໄດ້." (ເຮັບເຣີ 11:19).
ພໍໃກ້ຈະຮຸ່ງເຊົ້າ ອັບຣາຮາມກໍໄປປຸກອີຊາກ ແລະ ບອກວ່າ: “ພຣະເຈົ້າສັ່ງໃຫ້ພວກເຮົາໄປຖວາຍເຄື່ອງບູຊາເທິງພູເຂົາທີ່ຢູ່ທາງທິດໃຕ້.” ແລ້ວພໍ່ກັບລູກກໍກຽມເອົາຟືນ ແລະ ເຄື່ອງຕ່າງໆໃສ່ເທິງຫຼັງໂຕລາ ແລ້ວພວກເຂົາກໍອອກເດີນທາງໄປບ່ອນທີ່ພຣະເຈົ້າໄດ້ບອກ ພ້ອມກັບຄົນຮັບໃຊ້ສອງຄົນ. ຊ່ວງເວລາທີ່ເດີນທາງໄປນັ້ນ ແຕ່ລະຄືນອັບຣາຮາມກໍໄດ້ຖ່ອມຕົວອະທິຖານຢ່າງເປັນທຸກໃຈເພື່ອຂໍເຄື່ອງໝາຍຢືນຢັນວ່າ ຄຳສັ່ງຂອງພຣະເຈົ້ານັ້ນແມ່ນແທ້ຫຼືບໍ່. ແລ້ວການອະທິຖານຂອງອັບຣາຮາມນັ້ນກໍຍັງບໍ່ມີຄໍາຕອບປະການໃດນອກຈາກສຽງຂອງພຣະເຈົ້າທີ່ສັ່ງໃຫ້ຖວາຍອີຊາກນັ້ນຍັງດັງກ້ອງກັງວານຢູ່ໃນຫູຂອງເພິ່ນຕະຫຼອດ.
ແຜນການຂອງຊາຕານ
ຊາຕານຄອຍຢູ່ໃກ້ອັບຣາຮາມພ້ອມທີ່ຈະໃສ່ຄວາມຄິດໃຫ້ວ່າ ທ່ານກຳລັງຖືກຫຼອກ ເພາະພຣະບັນຍັດຂອງພຣະເຈົ້າໄດ້ສັ່ງຫ້າມໄວ້ວ່າ “ຢ່າຂ້າຄົນ” ແລະ ພຣະເຈົ້າຄົງບໍ່ຕອ້ງການໃຫ້ເຮັດໃນສິ່ງທີ່ພຣະອົງໄດ້ຫ້າມໄວ້.
ອ້າງອີງຈາກປຶ້ມ "ພຣະຄຳພີ" ປະຖົມມະການ 22:1-19; ໂຢຮັນ 3:16.
ອ້າງອີງຈາກປຶ້ມ "ບັນພະຊົນກັບຜູ້ເຜີຍພະວະຈະນະ" (ສະບັບພາສາໄທ) {ໜ້າ 147-155} ຂຽນໂດຍ ທ່ານ ນາງ ເອເລັນ ຈີ. ໄວທ.
ພວກເຂົາເດີນທາງມາເຖິງພູເຂົາໂມລິຢາເປັນເວລາສາມວັນ. ອັບຣາຮາມແນມເບິ່ງທາງທິດເໜືອ ແລະ ເຫັນເຄື່ອງໝາຍທີ່ຊົງສັນຍາໄວ້ຄື ເມກທີ່ມີແສງແຈ້ງສະຫວ່າງເຫຼື້ອມສົດໃສອ້ອມຮອບຍອດພູເຂົາໂມລິຢາ. ຫົວໃຈຂອງອັບຣາຮາມເຖິງກັບຊຸດລົງ ແລ້ວເພິ່ນຈຶ່ງແນ່ໃຈວ່າ ສຽງຄຳສັ່ງນັ້ນແມ່ນມາຈາກສະຫວັນ.
ແລ້ວອັບຣາຮາມຫຼຽວຫຼັງຫາຄົນໃຊ້ ແລະ ບອກພວກເຂົາວ່າ: “ພວກເຈົ້າຈົ່ງຖ້າຢູ່ທີ່ນີ້ ຂ້ອຍ ແລະ ລູກຊາຍຂອງຂ້ອຍຈະໄປນະມັດສະການພຣະເຈົ້າຢູ່ເທິງພູ.”
ພວກເຂົາໄດ້ເອົາສິ່ງຂອງສຳລັບເຄື່ອງຖວາຍບູຊາອອກຈາກຫຼັງໂຕລາ. ອີຊາກແບກຟືນ. ສ່ວນອັບຣາຮາມຖືມີດກັບຖ່ານໄຟທີ່ພວມລຸກຢູ່. ແລ້ວພໍ່ກັບລູກກໍຂຶ້ນໄປເທິງພູ.ໃນຂະນະທີ່ພວກເຂົາກຳລັງຂຶ້ນໄປເທິງພູ ອີຊາກໄດ້ສັງເກດເຫັນວ່າ ພວກເຂົາບໍ່ໄດ້ມີທຸກສິ່ງສໍາລັບການຖວາຍ. ສະນັ້ນ ລາວຈຶ່ງໄດ້ຖາມພໍ່ຂອງລາວວ່າ: “ພໍ່ເອີຍ! ຟືນກັບຖານໄຟກໍມີແລ້ວ ແຕ່ລູກແກະທີ່ຈະເຜົາບູຊານັ້ນຢູ່ໃສ?”
ອັບຣາຮາມຕອບວ່າ: “ພຣະເຈົ້າຈະຈັດຫາໃຫ້ເອງ.”
ເມື່ອພວກເຂົາມາຮອດບ່ອນທີ່ຈະເຮັດພິທີຖວາຍບູຊາໃຫ້ພຣະເຈົ້າ. ອັບຣາຮາມ ແລະ ອີຊາກກໍໄດ້ຊ່ອຍກັນສ້າງແທ່ນບູຊາຂຶ້ນ ແລະ ວາງຟືນໄວ້ເທິງແທ່ນບູຊາ. ເມື່ອສຳເລັດແລ້ວ ອັບຣາຮາມກໍໄດ້ບອກຄຳສັ່ງຂອງພຣະເຈົ້າໃຫ້ອີຊາກຟັງດ້ວຍສຽງທີ່ສະເທືອນໃຈ. ອີຊາກຕົກໃຈເມື່ອຮູ້ວ່າ ຕົນເອງເປັນເຄື່ອງຖວາຍໃຫ້ແກ່ພຣະເຈົ້າ ແຕ່ອີຊາກບໍ່ໄດ້ຂັດຂືນ ຫຼືແລ່ນໜີໄປຈາກທີ່ນັ້ນ. ລາວຮູ້ສຶກເປັນກຽດທີ່ໄດ້ຖືກເອີ້ນໃຫ້ຍິນຍອມຖວາຍຊີວິດເພື່ອເປັນເຄື່ອງບູຊາໃຫ້ພຣະເຈົ້າ ເພາະລາວເຂົ້າໃຈຄວາມຮູ້ສຶກຂອງພໍ່ ແລະ ກໍມີຄວາມເຊື່ອເຊັ່ນດຽວກັນ. ອີຊາກພະຍາຍາມປອບໃຈພໍ່ ແລະ ບອກໃຫ້ພໍ່ມາມັດຕົວລາວໄວ້ ແລະ ເອົາລາວວາງໄວ້ເທິງກອງຟືນທີ່ແທ່ນບູຊາເພື່ອທີ່ຈະເຜົາຖວາຍໃຫ້ພຣະເຈົ້າ.
ແລ້ວອັບຣາຮາມກໍໄດ້ມັດລູກຊາຍຂອງເພິ່ນ ແລະ ເພິ່ນໄດ້ກອດລູກຊາຍເປັນຄັ້ງສຸດທ້າຍພ້ອມກັບອຳລາຈາກກັນດ້ວຍການຮ້ອງໄຫ້ນ້ຳຕາໄຫຼຢ່າງບໍ່ຂາດສາຍ. ແລ້ວອັບຣາຮາມກໍໄດ້ຈັບມີດຍົກຂຶ້ນມາເພື່ອກຽມພ້ອມທີ່ຈະລົງມືຂ້າອີຊາກ.
ແຕ່ໃນທັນໃດນັ້ນ ພຣະເຈົ້າໄດ້ເອີ້ນອັບຣາຮາມຈາກສະຫວັນວ່າ: “ອັບຣາຮາມ! ອັບຣາຮາມເອີຍ!”
ອັບຣາຮາມຕອບວ່າ: “ເຈົ້າ! ຂ້ານ້ອຍກຳລັງຟັງຢູ່”
ພຣະເຈົ້າໄດ້ກ່າວຕໍ່ອັບຣາຮາມວ່າ: “ອັບຣາຮາມເອີຍ! ຢ່າທຳຮ້າຍ ຫຼືເຮັດຫຍັງໃຫ້ຊາຍຄົນນີ້. ບັດນີ້ ເຮົາຮູ້ແລ້ວວ່າ ເຈົ້າເຊື່ອຟັງ ແລະ ຢຳເກງພຣະເຈົ້າຢູ່ສະເໝີ. ດ້ວຍວ່າ ເຈົ້າບໍ່ໄດ້ຫວງລູກຊາຍຂອງເຈົ້າ ແຕ່ຍອມຖວາຍລູກຊາຍຄົນດຽວຂອງເຈົ້າໃຫ້ແກ່ເຮົາ.”
ອັບຣາຮາມກອດລູກຊາຍຂອງເພິ່ນພ້ອມທັງຂອບພຣະຄຸນພຣະເຈົ້າດ້ວຍໃຈທີ່ຊົມຊື່ນຍິນດີ. ແລ້ວເພິ່ນໄດ້ຫຼຽວເຫັນແກະໂຕໜຶ່ງເຂົາຂອງມັນຕິດຄາຢູ່ພຸ່ມໄມ້ ເພິ່ນຈຶ່ງເອົາແກະໂຕນັ້ນມາຖວາຍໃຫ້ພຣະເຈົ້າແທນລູກຊາຍຂອງເພິ່ນ.
ພຣະເຈົ້າໄດ້ກ່າວຕໍ່ອັບຣາຮາມອີກວ່າ: “ເຮົາຈະອວຍພອນເຈົ້າຢ່າງຫຼວງຫຼາຍ ເພາະເຈົ້າໄດ້ເຮັດຕາມສິ່ງທີ່ເຮົາບອກ ແລະ ບໍ່ໄດ້ຫວງລູກຊາຍຄົນດຽວຂອງເຈົ້າເອົາໄວ້. ເຮົາຈະອວຍພອນເຈົ້າຢ່າງແນ່ນອນ ແລະ ຈະເຮັດໃຫ້ເຊື້ອສາຍຂອງເຈົ້າມີຢ່າງຫຼວງຫຼາຍເໝືອນດັ່ງດວງດາວໃນທ້ອງຟ້າ ແລະ ເໝືອນດັ່ງເມັດດິນຊາຍທີ່ແຄມທະເລ. ເຊື້ອສາຍຂອງເຈົ້າຈະປົກຄອງເມືອງຕ່າງໆຂອງເຫຼົ່າສັດຕູຂອງພວກເຂົາ. ທຸກໆປະເທດຊາດທົ່ວໂລກຈະໄດ້ຮັບພະພອນຜ່ານທາງເຊື້ອສາຍຂອງເຈົ້າ ເຮົາຈະເຮັດສິ່ງທັງໝົດນີ້ເພາະເຈົ້າເຊື່ອຟັງຄຳສັ່ງຂອງເຮົາ.”
ດ້ວຍຄວາມຊົມຊື່ນຍິນດີ ແລະ ດ້ວຍໃຈທີ່ຂອບຄຸນພຣະເຈົ້າ ອັບຣາຮາມຈຶ່ງເອີ້ນສະຖານທີ່ແຫ່ງນີ້ວ່າ: "ອົງພຣະຜູ້ເປັນເຈົ້າຈັດຕຽມໃຫ້" ແລ້ວອັບຣາຮາມ, ລູກຊາຍ ແລະ ຄົນຮັບໃຊ້ຂອງເພິ່ນກໍພາກັນກັບເມືອເຮືອນ.
ອ້າງອີງຈາກປຶ້ມ "ພຣະຄຳພີ" ປະຖົມມະການ 22:1-19; ໂຢຮັນ 3:16.
ອ້າງອີງຈາກປຶ້ມ "ບັນພະຊົນກັບຜູ້ເຜີຍພະວະຈະນະ" (ສະບັບພາສາໄທ) {ໜ້າ 147-155} ຂຽນໂດຍ ທ່ານ ນາງ ເອເລັນ ຈີ. ໄວທ.
ເປັນຄົນຊອບທຳໂດຍທາງຄວາມເຊື່ອ
"ອັບຣາຮາມໄວ້ວາງໃຈໃນພຣະເຈົ້າ ແລະ ດ້ວຍເຫດນັ້ນ ພຣະເຈົ້າຈຶ່ງພໍໃຈ ແລະ ຮັບວ່າ ເພິ່ນເປັນຄົນຊອບທຳ." ປະຖົມມະການ 15:6
ພຣະເຈົ້າສັ່ງໃຫ້ອັບຣາຮາມມອບລູກຊາຍຂອງເພິ່ນຖວາຍເປັນເຄື່ອງບູຊາ. ອັບຣາຮາມໄດ້ເຊື່ອຟັງ ແລະ ໃນຂະນະທີ່ເພິ່ນກຳລັງຈະຂ້າລູກຊາຍຂອງເພິ່ນເພື່ອເປັນເຄື່ອງຖວາຍບູຊາຢູ່ນັ້ນ ພຣະເຈົ້າໄດ້ເຫັນການເຊື່ອຟັງຂອງອັບຣາຮາມ ພຣະອົງຈຶ່ງເຂົ້າມາຂັດຂວາງເພິ່ນ ແລະ ໄດ້ປະທານແກະໂຕໜຶ່ງໃຫ້ແກ່ອັບຣາຮາມ ເພື່ອເປັນເຄື່ອງບູຊາແທນອີຊາກ. ການທີ່ພຣະເຈົ້າທົດສອບຄວາມເຊື່ອຂອງອັບຣາຮາມນີ້ ກໍເພື່ອຢາກພິສູດຄວາມຈົ່ງຮັກພັກດີຂອງອັບຣາຮາມທີ່ມີຕໍ່ພຣະອົງ ເພາະທີ່ຜ່ານມາອັບຣາຮາມບໍ່ໄດ້ມີຄວາມເຊື່ອທີ່ເຂັ້ມແຂງເທື່ອ. ເພິ່ນເຄີຍສະແດງຄວາມບໍ່ໄວ້ວາງໃຈໃນພຣະເຈົ້າໂດຍບໍ່ເຊື່ອວ່າ ນາງຊາຣາຈະມີລູກ. ພຣະເຈົ້າຊົງຮັບການເຊື່ອຟັງທີ່ສົມບູນຄື ການເຊື່ອຟັງທີ່ບໍ່ມີຄວາມສົງໄສໃນພຣະເຈົ້າເທົ່ານັ້ນ. ເຖິງແມ່ນວ່າ ການທົດສອບຈະຍາກກໍຕາມ ແຕ່ມັນກໍພິສູດໃຫ້ຄົນລຸ່ນຫຼັງໄດ້ເຫັນວ່າ ອັບຣາຮາມເປັນຕົວຢ່າງແຫ່ງຄວາມເຊື່ອທີ່ສົມບູນໃນພຣະເຈົ້າ.
ນອກຈາກນີ້ ການທົດສອບທີ່ພຣະເຈົ້າໄດ້ໃຫ້ອັບຣາຮາມຢ່າງໂຫດຮ້າຍໜັກໜ່ວງ ຈົນເຮັດໃຫ້ຈິດໃຈຂອງເພິ່ນຕ້ອງເຈັບປວດທໍລະມານເປັນເວລາຫຼາຍມື້ນັ້ນ ເພື່ອຊ່ວຍໃຫ້ອັບຣາຮາມເຂົ້າໃຈຫຼາຍຂຶ້ນເຖິງການເສຍສະຫຼະອັນຍິ່ງໃຫຍ່ຂອງພຣະເຈົ້າໃນການໄຖ່ມະນຸດໃຫ້ລອດພົ້ນອອກຈາກຄວາມບາບ. ການທີ່ພຣະເຈົ້າພຣະບິດາໄດ້ປະທານພຣະບຸດຂອງພຣະອົງໃຫ້ທົນທຸກອັບອາຍຈົນເຖິງແກ່ຄວາມຕາຍ ກໍເພື່ອສະແດງໃຫ້ເຫັນເຖິງຄວາມຮັກ ແລະ ຄວາມເມດຕາອັນເຫຼືອລົ້ນຂອງພຣະເຈົ້າທີ່ມີຕໍ່ມະນຸດຄົນບາບ. ພຣະເຈົ້າພຣະບິດາບໍ່ໄດ້ຊົງຫວງພຣະບຸດອົງດຽວຂອງພຣະອົງໄວ້ ແຕ່ໄດ້ຊົງປະທານພຣະບຸດຂອງພຣະອົງນັ້ນມາເພື່ອພວກເຮົາ. ສ່ວນລູກແກະທີ່ຖວາຍແທນອີຊາກນັ້ນເປັນເຄື່ອງໝາຍສະແດງເຖິງພຣະບຸດທີ່ຈະມາຕາຍເພື່ອໄຖ່ຄວາມບາບຂອງພວກເຮົາ.
"ເພາະວ່າ ພຣະເຈົ້າຊົງຮັກໂລກຫຼາຍທີ່ສຸດ ຈົນໄດ້ປະທານພຣະບຸດອົງດຽວຂອງພຣະອົງ ເພື່ອທຸກຄົນທີ່ວາງໃຈເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດອັນຕະຫຼອດໄປເປັນນິດ" (ໂຢຮັນ 3:16).
ອ້າງອີງຈາກປຶ້ມ "ພຣະຄຳພີ" ປະຖົມມະການ 22:1-19; ໂຢຮັນ 3:16.
ອ້າງອີງຈາກປຶ້ມ "ບັນພະຊົນກັບຜູ້ເຜີຍພະວະຈະນະ" (ສະບັບພາສາໄທ) {ໜ້າ 147-155} ຂຽນໂດຍ ທ່ານ ນາງ ເອເລັນ ຈີ. ໄວທ.